檳城,浮羅交怡之旅-Day 1 (上)－Music的天空

26/5/2012出發喇!我地坐國泰8:20早機去,飛3hr40min,12:00就到咗檳城

檳榔喺馬來西亞北部,因為有好多檳榔樹而得嚟呢個名.檳榔嶼原本只喺一個荒島,只有海盜喺度住,到咗18世紀尾比英國東印度公司既法蘭斯船長發現,而且向吉打國蘇丹租借,將呢度一步步咁發展,呢度有85%喺華人,所以周圍都見到中文字,而且有好多華人都識講廣東話,其餘都喺印度人同馬來土著,閩南話喺呢度好通行.首都喺檳城,又叫"喬治亞市"或者"喬治城",喺檳榔嶼既東北端,喺馬來西亞最大既國際自由商港同全國第二大城市.檳榔嶼周圍都有多姿多彩既宗教同文化特色,州立博物館、藝術館、佛教寺廟同清真寺遍佈成個島,反映咗由18世紀以嚟好多民族一齊開發呢個咁靚島嶼,檳城有好多風味小食,呢度賣啲嘢多數都喺免稅,價錢又平,由吉隆玻、新加坡、香港、曼谷都有飛機直到檳城,而由吉隆玻搭火車可以去到檳城對面既北海,再轉搭船或者巴士過海就到檳城

間包車公司好準時咁喺檳城機埸接我地,第一站就帶我地去蛇廟

蛇廟又叫青龍廟,喺檳城東南面14公里既日落洞路,離機場1.6公里,蛇廟原本祭祀既喺清水祖師,叫做興福堂,因為有好多青蛇喺度,所以又叫蛇廟,廟入面既廊柱、燭臺、香爐、神像上面周圍都見到有蛇,不過呢度啲蛇唔會傷人,日抖啲蛇都比啲煙熏到暈暈地,夜晚先會出嚟周圍爬,食吓信徒留低既嘢食.

去完蛇廟司機就車咗我地去新世界foodcourt食午餐,呢度啲嘢食真喺好平,我地好似餓鬼咁叫勁多,真喺嚇親隔離枱,成枱咁多都喺幾十蚊咋

新加坡薄餅RM4.5

粿條湯RM3.5

東陰海鮮湯RM5

薄餅RM3.5

炒粿條RM4

食飽飽行上車前見到呢個好搞笑既廣告

跟住就去張弼士故居(藍屋)

經過近百年既風雨同戰火之後,喺東南亞唯一可以留番落嚟最完整既張弼士故居就喺呢間藍屋,佢喺1897年開始起,用咗七年時間先起好,當時張弼士喺清政府駐新加坡總領事,同轄檳城,馬六甲同埋附近啲英國殖民地事務,所以佢就成日喺新加坡同檳城兩邊走,呢間屋喺當年嚟講喺一間豪宅,佢外面就好中國化,但喺入面啲擺設就中西合壁,張弼士好錫佢第七個老婆,所以佢列明藍屋要喺佢第七個老婆生既仔死咗之後先可以賣,喺1989年佢呢個仔死咗之後,藍屋就比一班保護遺址既人買咗落嚟,保全到而家,入去參觀要比RM10

可能呢間屋都有百幾年歷史既關係,而且入面仲放咗好多張當時佢地一家人既遺照同家俬,所以呢間屋都好猛吓,我地入到去無幾耐,我個朋友影張單人照,影完發覺佢隔離多咗個白色人頭,可惜我都未睇到就比佢地刪除咗喇!跟住我地入到啲房度,入面喺放咗好多佢地生前既相,入到去影啲相就全部唔喺蒙查查就有好多白煙,全部都唔要得,即喺表示佢地根本就唔鐘意人地入佢間房度影相啦,我隻佬就見到啲床有好多白煙升上嚟,而我就越行越頭痛,痛到頂唔順走番出屋外面曬太陽先冇事,後來我返到香港執相時比我發現到有張相影到嘢,喺紅圈位放大嚟睇會見到有個白影坐咗喺度