Music的天空

之前講到我地一去到女王城就車我地去酒店Check In,呢間酒店啲設計好古怪,一入門口大堂已經喺五樓而所有房都喺响樓下嗰幾層,所以一出電梯就覺得啲走廊好陰暗

我地Check In 完一入房就例牌先周圍影,影完先開行李放啲嘢出嚟,但喺我朋友就開咗好耐都開唔到個喼,跟住我去幫手搞咗好耐都喺開唔到,咪唯有叫隔離房個男團友過嚟幫手啦,最後都搞咗好耐先Chok得開個喼,之後我地出去食完嘢影完相返酒店,當我沖涼時,沖沖吓無端端我一條戴咗成十年既頸錬自己喺中間斷開咗,嗰條喺K白金錬本身喺好硬既,就算喺好大力拉都最多喺個扣爛,真喺唔知點解會沖沖吓涼自己喺中間斷咗,我當時都冇諗過啲咩古怪嘢,沖完出番去坐咗一陣就覺得間房好凍,凍到好似雪房咁,我仲問我朋友喺咪開咗冷氣呀?佢話冇喎!咁我地兩個就一齊搵吓個冷氣開關啦,點之間房只喺得部暖氣,根本就冇冷氣既!咁我就話喺喎女王城咁凍都唔需要冷氣呢樣嘢啦,不過間房好似仲凍過條街咁既?
跟住我地都喺唔理咁多瞓覺啦!當時我聽到我朋友好快就瞓著咗,我過咗一陣都瞓著埋,當我瞓到半夜時,我朋友好急咁爬上我張床,當我一開眼就見到佢個死人頭好驚咁貼埋嚟,我真喺比佢咗嚇一跳,睜大隻眼問佢做咩呀?佢就話今晚要過嚟同我一齊瞓,咁是但啦,大家女仔都冇咩所謂既!當時我都知咩事架喇,識咗佢十幾年都未見過佢咁樣,但喺都要鬧吓佢半夜三更搞醒我囉!
到咗第二朝見到佢都仲喺好驚青咁樣就唔問佢發生咩事住,食早餐嗰陣就即刻同個領隊講要換房,佢只喺問咗兩句就即刻話換比我地喇!佢話今日我地去完美福灣玩完返嚟就同大堂講,佢地就會比過條鎖匙我地換房架喇!
當離開咗間酒店搭緊車嗰陣我先問佢禽晚發生咩事?佢就話當時啱啱瞓落床就已經覺得有人瞓咗落嚟,佢自己又好眼瞓,諗住河水不犯井水就放咗個枕頭喺中間瞓過啲唔理佢啦!點之佢瞓到半夜就覺得個枕頭一路迫緊過嚟,佢就打則身再瞓過啲啦,但喺好似繼續喺咁迫埋去想迫佢落床咁,佢已經冇晒位瞓,當佢留心聽吓就聽到有兩個呼吸聲,一個喺我既,另一個喺响佢後面傳嚟,跟住佢都仲詐唔知想繼續瞓,點之嗰隻嘢仲一手揸佢隻痛腳,咁佢就痛到成日彈起衝咗上我張床要同我一齊瞓囉!
後來返到香港佢就e咗間房啲相比個有陰陽眼既朋友睇,睇吓佢見唔見到有嘢啦!點之佢一睇就問我朋友喺咪嗰晚瞓近窗個張床,佢話見到嗰張床有煙升上嚟,個窗簾右上角仲有個人頭,我一聽到就叫佢e張相比我睇,我張佢放大咗之後就睇到喇!真喺有啲驚呀!好彩我唔喺瞓嗰張床啫!佢仲話其實你地一個開唔到喼,一個條錬無端端斷咗,又覺得間房咁凍,都已經比晒警告你地喇,咁都唔醒目走人既!

原來呢件事仲未完架!之後我地返到香港約咗其中一個團友出嚟食飯,講起呢件事,佢話我地嗰朝叫換房之後就出去美福灣玩啦,玩完返嚟隔離房個男團友返房時見到有個鬼佬入咗我地間房,間酒店又幾快手喎,幫我地搬埋行李轉埋房仲咁快有第二個人Check In入去住..........我地一聽到就即刻呆咗,吓.....我地都未搬,嗰日喺隔離房返去先架!因為佢喺自己跟當地團去美福灣,回程時見到佢地架車走咗好耐我地先走,所以一定喺佢地返到酒店先過我地,我地返到酒店先問大堂攞鎖匙,然後自己返房執嘢再換房,所以一定唔會嗰個時間有個鬼佬入到我地間房,唔通佢喺見到禽晚搞我個朋友嗰隻嘢..........一講到呢度我地就一齊起晒雞皮喇
其實我地成日去旅行都有好多時撞到呢啲古怪事架喇!不過只有呢次先至影到相,等我有時間先再寫埋其他靈異事啦!