朝早起身例牌都喺喺酒店食自助早餐,都有幾多款揀,連壽司,魚生,格仔餅都有得食,
不過發覺啲侍應好蠢,我地三個人各飲唔同嘅飲品,佢地第一次就只喺攞一杯嚟,第二次就攞錯咗,第三次就唔記得咗冇咗影,最死就喺個個侍應都黑蚊蚊,根本就唔認得邊個打邊個,都唔知追邊個好,結果不停重覆叫果三杯嘢飲好多次,激死人,最後搞到差唔多食完先攞齊三杯嘢飲嚟,第二朝食早餐都喺案件重演,真係吹脹,但喺佢地又好好禮貎都鬧佢地唔落.
食完就去遠望十二門徒山(The 12 Apostles)
個景真喺好靚,影咗兩三張正經嘅相之後,我地又開始嚟料啦!又扮模特兒又喺度扮型,又喺草地奔跑,我仲捉住個女仔要騎佢(話要騎鴕鳥)總之冇張相正經,掛住玩所以咁靚嘅景都係影得一張炸,激死!
跟住我地就去海豹島(Seal Island)睇海豹,去到碼頭未夠鐘上船,有啲時間比我地行吓喺碼頭個跳蚤市場,
我個朋友就喺呢檔買咗個好靚嘅鴕鳥蛋擺設,
ZAR300,好抵,隻蛋除咗畫咗好多隻動物之外仲畫咗個南非地圖喺上面,手工真喺好精細,佢地賣咗啲蛋喺幫啲海豹壽款保護佢地嘅生態,我自己就喺頭兩檔睇中咗啲河馬擺設,ZAR40一個,唸住睇多幾檔先買啦!就喺呢個時候個朋友走埋嚟話喺另一邊見到有隻好大嘅海豹喺條路度比人影相,我地走到埋去睇吓,原來喺有個當地人捉咗隻海豹上嚟,比人影相嚟賺錢,影一次ZAR10.真喺想告佢,點可以捉隻海豹上嚟架?
影完已經夠鐘上船啦,咁又唔記得咗買果個河馬擺設啦,後來再去其他地方都揾唔番嚟買,又一次做咗後悔事.
搭緊船就當然不忘喺咁影相啦!
終於去到啦!不過都幾遠吓,要將個鏡頭拉到最近先影到
回程時喺碼頭有幾個黑人喺度表演賺錢,
跟住去康士坦尼亞酒園
果日喺我個男仔朋友生日,當入到去比啲紅酒我地試時,我就同啲團友講佢今日生日,然後帶起一齊唱生日歌比佢聽,佢又感動又驚喜,當時全個酒園啲人都望晒過嚟呀!
去完酒園我地就去食原隻龍蝦餐,
隻龍蝦真喺好大隻,仲好好味!
餐廳出邊有一個好靚嘅沙灘,有好多海鷗喺度,我地一食完就即刻走出去影相
影完相見到果度有個搖搖板,我地又走去玩一餐,實在太忘形啦,原來全團人企晒喺度睇住我地玩都唔知.
跟住去企鵝灘(Penguin Island)睇企鵝,
唔單只有企鵝仲有田鼠
睇完企鵝路經見到個景好靚
行行吓突然聽到有人唱歌好好聽,走過去睇吓,原來有幾個黑人喺條路度唱歌,佢地冇用樂器只喺清唱都好好聽
我喺度拍緊果陣就突然走咗個黑人埋嚟叫我買佢地隻CD,一隻ZAR70,不過我地冇買到,因為覺得唔抵.
然後我地就搭纜車上角點(Cape Point),果度啲風景真喺好靚
上完角點我地再去好望角 (Cape of Good Hope),好望角 喺由一位葡萄牙藉嘅航海家發現,剛發現初時更被認為喺世界最遠處嘅地方,由於喺大西洋同印度洋嘅交界,所以長年吹住強風,亦叫暴風之角.
已經去晒今日要去嘅行程啦,我地就去食晚飯,今餐食中菜
食食吓個領隊走過嚟話個師機開唔到架旅遊巴個車門,而家揾緊人嚟整叫我地慢慢食,後來等咗好耐都開唔到個車門,個師機就買咗一支酒請我地飲,飲落個個都話覺得好好味喎!問個師機係咩酒嚟架?佢就話呢隻酒係南非嘅特產(Amarula)係一種果汁酒嚟,但喺我就覺得喺雲呢哪味,
當時我地就即刻唸起我地喺飛機上坐係我地隔離果個內地人,佢自己成日去南非出差,我地問過佢南非有咩喺一定要買架?佢就話一定要買呢隻酒,話好味道又夠平,而且只有南非先有得賣!後來我地叫個領隊帶我地去買呢支酒,我地周圍揾最終係一間士多度揾到1000ml- ZAR105,我地已經覺得好平,個個都買一支,點之臨返香港喺約翰尼堡機場嘅免稅店見到喺ZAR195兩支,又做多一件後悔嘅事啦!仲要咁早就買咗,拎住去咗咁多地方,激死!飲完酒之後個領隊突然攞咗個生日蛋糕出嚟同我個朋友慶祝生日真喺比咗個驚喜我地,
食完蛋糕架車都仲未開倒個車門要叫過第二架車嚟接我地,我就同個領隊一齊出咗門口食煙,當時我就企喺行人路,佢就企喺近馬路望吓架車到未,突然有一架白色貨車停喺我地面前,然後開咗車門走咗個黑人落嚟叫我地上車,當時我仲以為喺嚟接我地又或者喺整車嘅人,但喺聽真啲個黑人同個領隊嘅對話,就開始覺得唔妥,個黑人不停叫我地上車,個領隊就不停話唔上,我望入去果架車裏面,喺有幾個黑人喺架車到,心知不妙,我就開始向後移,好彩佢地都冇再進一步,後來開車走咗,都幾驚吓,個領隊真喺冇呃我地,南非夜晚真喺咁恐佈,後來佢同我地講,之前帶過一團,有個團友就喺呢個位比人搶咗個手袋,我地一聽就即刻一個二個貼埋一齊企,再等咗一陣架車都仲未到,我地就叫個領隊不如帶我地去超市買嘢飲同零食返酒店呀?佢就話連佢都唔敢行過去喎!叫我地唔好去好危險,就喺呢個時候突然見到一個身上件衫寫住保安嘅黑人,我地就叫佢帶我地去,點之佢話佢只喺負責保護啲車唔喺保護人嘅!真喺比佢吹脹,後來我地見佢行就一隻二隻跟住佢後面行,唸住安全啲,點之佢只喺不停咁來回呢條街睇車,當佢行到街頭就即刻突然轉身,就見到原來我地成班人跟住佢後面,真係搞笑!
留言列表
