Music的天空

2009年5月23-30,第一次去非州呢個地方,心情又興奮又緊張,因為上綱睇過好多人都話南非治安唔好,最好喺跟團唔好自己去,所以我地都喺決定跟團會安全啲,我地三個朋友去,預早一個月就報咗名,但當我地報咗名之後就爆發豬流感,屋企人就不停咁反對,但喺都已經洗濕咗個頭,死就死啦,好多嘢都喺整定嘅,唯有聽天由命啦!我地果團原本有十八個人,後來有八個驚豬流感訂金都唔要,冇嚟到,所以我地果團就得十個人!不過係呢八日我地就真喺玩得好開心,每日都會有啲搞事嘢總係笑到喊晒!
    第一,二日:23:50機,咁就當一日啦真呃錢,不過去南非全部都喺搭呢班機嘅,當起飛時就已經冇咗一日啦!我地會先搭十三個鐘頭去到約翰尼斯堡(Johannesburg)

然後轉機要再搭多兩頭鐘去開普頓(Cape Town),對我呢啲搭飛機瞓唔著嘅人,呢十五個鐘簡直勁痛苦,當起飛後個幾鐘就開始食第一餐嘅飛機餐,

但喺個餐除咗個主菜之外全部都喺凍嘅,包括個麵包在內不過啲氣水鑵就好得意:一鑵200ml:

當食緊飛機餐時就已經發生第一單搞笑嘢啦!當我搽牛油落麵包時就彈到啲牛油周圍都喺,就連自己啲頭髮都有,因為張枱太細又一邊食一邊跌啲嘢落地, 比佢地俩個一路食一路鬧我.(一定喺佢倆個夾住我坐中間,搞到我冇晒位,我先會咁嘅)因為知道自己瞓唔著唯有Download多啲戲落部機度不停睇啦!搭咗一半有啲肚餓,自己帶咗一盒蛋糕,當攞出嚟食時發現盒蛋糕個盒爆開咗嘅,點解呢?打開時每個蛋糕都因為氣壓發脹晒好得意

臨落機個幾鐘又開始食早餐啦!

南非比香港時差慢六個鐘,搭完十三個鐘頭機去到約翰尼斯堡都喺朝早七點,

喺嗰邊機場等多兩個鐘再轉機去開普頓,

去到開普頓係下午一點幾.

需然我地個團得十個人,但係我地全程都係坐架大旅遊巴,喺呢度真喺要讚一吓美X華.

每個人都可以一個人坐幾個位,我地三個就坐晒後面成十幾個位,我地喺架車度又跳舞又打架,日日玩到癲晒.
一落機就即刻開始第一個行程去鴕鳥園(Ostrich Farm),未落車就見到一大片草地好靚好舒服

  一入到去就見到有幾隻孔雀周圍走,但鴕鳥都未見到就去食喺南非嘅第一餐(鴕鳥肉)入到果間餐廳覺得好有田園氣息

不過啲鴕鳥肉味道就麻麻地，反而個汁就好好味，食完就開始去睇鴕鳥

佢地啲眼睫毛好長好靚架!
跟住仲比我地餵鴕鳥,不過佢地啄落嚟都幾痛吓,

然後我地又去騎鴕鳥,啲鴕鳥原來真係好蠢嘅,當啲工作人員用個布袋套住佢地個頭之後,佢地就唔識郁任你騎啦!

喺果到仲見到幾隻雞,佢地隻腳指上面啲毛生得好長,好似著咗鞋咁好得意架!

每隻鴕鳥蛋都要孵兩年先出世,呀爸呀媽輪流日夜孵,而每隻鴕鳥都有五十歲命嘅,而佢地隻腳係好大力,比佢踼一腳老虎都會死!
果度有間鋪頭賣啲精品同鴕鳥蛋,不過就一啲都唔平.

  離開鴕島園之後我地就向桌山(Table Mountain)出發,桌山喺開普頓嘅象徵,高海拔1086米,好似一張大枱放喺平原上面咁,傳說話喺耶穌同十二門徒食最後晚餐嘅餐枱,桌山上面只有一度,我地一落車未上山就已經覺得好凍啦,個個都即刻去行李喼度揾衫著,好彩我之前查過南非嘅天氣,知道果邊最低得二度,我就帶咗件羽絨去,佢地倆個仲笑我發冷呀!最終咪凍到跳晒舞,抵死!

我地坐旋轉吊車上去,

好可惜果日上面好大霧乜都影唔到

因為太凍而且又影唔到景,我地就走咗入去間Caf'e度行吓,入到去都只喺有啲嘢食吓賣吓,冇咩好做,喺呢個時候我地聽到啲音樂聲,又見冇人我地就發癲跳舞拍video,點之原來有個黑人工作人員係角落頭一直睇住我地,笑到佢肚痛,我地發現後仲走埋去叫佢Give me five,笑鬼死佢.

上完卓山之後我地就去維多利亞度假區,仲以為有啲咩玩,原來只係一個商場

南非啲果仁都幾出名好食架,後來果幾日去其他超市都貴過呢間好多,真喺好後悔買得一包咁少.
  跟住就去食晚飯(原隻鮑魚餐)需然唔係好大隻,但係都幾入味,其他嘢食味道都唔錯

  食完終於可以返酒店啦,好嘢!我要第一時間沖番個靚涼先,已經兩日幾冇沖涼啦!只係係機場等轉機時入咗廁所刷牙洗面炸!平時一日都沖兩次啦,仲要去咗咁多地方,真係好想沖涼呀!

上到去一出升降機......咦!有一塊大玻璃閘住個走廊入唔到嘅?哦......原來要插入房咭匙先可以開到度玻璃門入到走廊嘅,啲保安都幾好喎!我地仲等個女仔朋友入咗去等佢自動關埋我地倆都唔入去,跟住佢就貼埋度玻璃門叫"救命呀!放我出去呀!",啱啱個領隊上到嚟比佢見到添,我地真喺咁都有得玩一餐.
啱啱先讚完佢地啲保安幾好,但話口未完搞事嘢又嚟啦......我個女仔朋友先插入咭匙開門,我就跟住佢後面,當佢一開門就即刻呀一聲大叫轉身就走,我就梗係唔理三七二十一跟住走啦!當我轉身走前一秒我就見到房入面喺有行李,啲床鋪仲要喺亂嘅!當我地走咗兩步啱啱個黑人送我地啲行李上嚟,佢聽到我地叫,就走過嚟問咩事,我地都未答佢,佢就攞咗我地條咭匙再開門,開咗後問我地有咩問題,我地就話:"入面有行李",佢又問:"有行李有咩問題呀?"我地又話:"但喺啲行李唔喺我地架!我地果啲喺你呢度呀!"跟住佢又呀一聲大叫關埋度門,即刻幫我地拉啲行李去我個男仔朋友間房度,入到去都未驚完,佢又走去錯手熄燈,我個女仔朋友又呀一聲大叫(好彩我仲未入去仲係房門口啫)就喺呢個時侯個領隊就即刻忍唔住鬧佢,喺嗰一刻我地都覺得佢好Man呀!個黑人就好驚咁不停同我地道歉,話即刻去同我地轉過間房,我就同佢講,話佢今日比咗兩個驚喜我地,跟住個個都笑到喊晒!
真喺咁都得嘅,冇唸過會有啲咁嘅嘢發生,仲喺五星級酒店,點可以咁烏龍架?我幾時先沖到個涼呀?我要沖涼呀!
所以奉勸各位,以後都係一入房就要即刻鎖埋度門先啦!唔喺突然有人開門入嚟就唔好啦!之後我地都仲要等咗好耐先轉到房比我地,終於可以沖涼啦!
我地喺南非總共住過三間酒店,但喺反而喺呢間酒店瞓得最舒服嘅!

PS:喺南非夜晚千其唔好自己出去,留喺酒店喺最安全嘅,個領隊話之前有幾個內地團友唔聽人講,夜晚自己出去浦,最後比人打劫完仲要開槍殺死埋,又有幾個外國人夜晚去酒吧浦,最後又係咁死咗,所以我地夜晚都留喺酒店,唔敢出去,咪唯有成日三條友一齊喺度做面膜囉,晚晚都好早就瞓,所以去南非跟團喺好舒服嘅,呢次都喺第一次跟團去旅行,而又可以日日都好夠瞓.
南非天氣係好乾燥,記得帶潤膚霜去,開普頓天氣喺十幾度至廿幾度,一早一晚好涼嘅,而約翰尼斯堡就喺幾度至十幾度.