Music的天空

之前去咗一個網上電台做旅遊節目嘉賓,而家有得聽喇!不過我發覺自己有一段嘢講錯咗,我講咗自己先搭十五個鐘去Cape Town然後再轉機去約翰尼斯堡,其實應該係我先搭十三個鐘去約翰尼斯堡然後再轉機去Cape Town,係到真係要講聲唔好意思,可能自己第一次做節目太緊張,加上自己又去完都有一段時間,所以都搞到錯晒喇!
大家有時間就入下面呢個網聽吓啦!
http://www.itahk.net/new/forum/viewthread.php?tid=10228&extra=page%3D1

從來冇唸過自己寫遊記會寫到比人叫去網上電台做旅遊節目嘉賓.
  最初唸住自己成日去旅行,去得多之後發覺之前有好多旅程都開始遺忘,所以就開始寫遊記,自己得閒可以重溫箇中樂趣之外,仲可以同其他人分享,亦可以分享一吓有啲咩地方好去,有啲咩值得好買,有時自己去旅行之前都會睇吓人地啲遊記去揾吓資料,都覺得幫到好多,所以自己都想幫吓其他人,都冇唸過會有啲咩回報,點之原來自己嘅遊記除咗有好多人睇之外,仲會比人叫我去網上電台做嘉賓,真係好開心,好有滿足感,自已嘅心機真係冇白費,真係有人鐘意嘅!
  之前自己去完南非就寫咗個南非遊記,其中有一個回應嘅人話佢係國際漫遊協會嘅,自己當時真係唔識呢個網,於事就入去睇吓,有一日佢就email比我問我有冇興趣上去佢地嘅網上電台分享一吓,因為佢地會做一個南非特輯,而佢自己就同幾個朋友去咗南非四十日,睇到我個遊記見到我跟團同佢地自由行都好唔同,而且有啲地方佢地都冇去到,所以都想同大家分享一吓自由行同跟團嘅分別.聽到佢咁講我自己都好有興趣上去講吓,自己又從來都未試過做電台節目嘉賓,都好想去玩吓,覺得好新奇好好玩,所以一口就答應佢.
  禽晚就上咗去錄音,未去之前都有啲緊張,好擔心自已嘅怯場症又發作,食晒縲絲,又驚唔識講嘢,咁就真係失禮死人喇!好彩去到都只有幾個人,所以就冇咁驚,我地大家係到傾吓計,講吓大家係南非嘅趣事,所以成個過程氣氛都好輕鬆,好快就做完一個節目,快到自己都覺得唔夠時間講唔晒,仲有好多有趣嘅嘢都未講到,不過真係覺得好好玩,好期待個節目快啲可以聽到,亦都好想有機會再去玩過!