2009年11月4日,原本想同媽咪去長隆玩兩日,不過唔成團,唯有睇吓有邊度成團就去邊度啦!之前上綱睇長隆啲資料時無意中比我睇到有啲人跟過一間叫美X之旅嘅旅行社,話又平又好,佢地喺純玩團唔會帶你去買嘢,聽落又幾好喎!雖然自己未聽過呢間旅行社,不過見好多人都讚好,就即管試吓啦!最後有一個御臨門溫泉渡假村$398,嘩!有冇咁平呀?睇落間酒店又好似幾靚喎,好......就跟呢個啦!佢地唯一唔好處就喺要自己去羅湖或皇崗集合!
為咗食個早餐搞到原本8:30集合,我地8:20先喺羅湖落火車,拉住呀媽走去集合地點,一出羅湖口岸就見到人山人海呀!原來除咗我地果團,果日呢間旅行社淨喺去御臨門都有三團,仲有好多去其他地方就唔知有幾多團,真喺好誇張,一去到點完名就見到我兩個同事,原來佢地啱啱結婚兩週年,又喺報咗呢團去玩,有冇咁邪呀?我地果團都有48個人,每餐分五圍枱食飯,我地仲要喺同一圍枱食,真搞嘢!
搭咗個幾鐘頭車之後就去到一個客家民俗館
入面有好多用毛主席頭象襟章砌成嘅畫
睇完之後就帶我地去惠州梅菜街買出名嘅梅菜,落車時見到個景幾靚喎!
喺呢度比我地自己行一個鐘,入去梅菜街喺一個街市,見到除咗有雞鴨賣之外仲有野味賣,我地見到都真喺有啲心寒!
領隊同我地講行呢條街一定要小心自已嘅財物,有好多扒手,行行吓我同事將個相機袋扣喺條褲側邊,當我地睇緊嘢時,就比人拉開佢個袋,啱啱佢老婆突然轉頭,個扒手就即刻走咗,我地另外有個團友當時就企喺我地後面,睇到晒成個過程,之後每個人都提高晒警覺再行,我就留心啲睇吓,真喺發現有好多人鬼鬼崇崇望住我地,真喺幾恐佈!
之後就搭車去食午餐,我地呢團喺共包三餐正餐,一餐酒店早餐,而每餐都有九餸一湯,不過全部都喺食客家菜,領隊話客家菜喺會將啲餸煮得好熟,不過啲雞喺好好味,好有雞味,因為全部雞都喺係正常環境下生長,而且喺唔會困住係個籠度,佢地周地走所以喺特別好味,食落又真喺好好味喎,可惜煮得太熟,唔喺就真喺冇得頂喇!而啲菜就喺有機菜,好新鮮,好有菜味嘅!
其他餸都幾好味,而呢條魚就滑到好似食緊豆腐咁!好味!
食完之後就再搭多兩個鐘頭車去御臨門溫泉渡假村!四點幾就去到酒店,一落車見到現場同綱上張相相差好遠喎,有啲貨不對辨嘅感覺. 呢個喺佢地張相,佢地喺綱上話自己喺跟印尼峇里島風情而起
呢個喺實景相
入到去個大堂都幾靚嘅,有啲峇里風情啦!
Check In完話我地間房仲執緊,唔喺掛四點幾都仲未執完?唯有去個同事間房玩吓先啦!
佢地間房喺係地下果層,對住個園景,都幾靚吓!等咗半個鐘左右到我地間房執好,喺二樓,入到去都幾好喎,我地喺對住個泳池,不過喺冇水嘅泳池囉!側面都望到個瀑布仔嘅!
仲未夠鐘食晚飯就周圍行吓影吓先
每個團都會有兩間別墅房送比我地,我地就玩抽奬,有四個團友抽中免費升級住一晚,真喺好運,原本住一晚要二千幾蚊架!入面仲有獨立溫泉比你自己浸
跟住六點幾就話食晚飯,喺酒店中菜廳食
啲雞仲煮得熟過之前果餐
呢個炆豬肉好入味,正!
呢個蘿蘿蔔炆牛筋同薯仔炆排骨都好好味,好入味!
吃完之後就自由活動直至第二日十二點先Check Out,真喺大把時間比我地浸溫泉,我地就走去睇吓果個泉眼,
行埋去真喺有硫磺味,亦都感覺到好熱,我地都覺得呢個溫泉應該喺真嘅,之後就返房換泳衣落去浸溫泉,入面真喺好大,有好多個溫泉池,每個溫泉都有寫上溫度比你揀要浸邊個,亦有一啲中藥池比你揀,入面仲有SPA同按摩做,中式全身按摩168人仔90分鐘,另每個部位38人仔半個鐘,瞓喺啲熱石上面按都幾舒服,可惜有啲人唔喺按摩都走嚟瞓,仲喺度大大聲講嘢嘈住晒,想瞓吓都唔得!
浸完之後就約埋啲團友一齊去食宵夜,我地行出去酒店門口有幾間食嘢嘅鋪頭,我地就去咗最近果間,我地八個人去食,叫咗都好多碟,等咗一陣,就聽到入面傳嚟有雞嘅慘叫聲,我地即刻靜晒......吓!佢地真喺即時殺隻雞煮比我地食,不過其中叫咗一煲雞粥,真喺好味到爆燈,個個都話從未食過咁好味嘅雞粥,一打開就已經嗅到好香,另外有個炒米粉都幾好味!
食完行番去酒店真喺凍到震,因為呢間酒店喺係山上邊,朝早同夜晚都幾凍.
第二朝八點幾就落去酒店食早餐,除咗一般酒店早餐之外最特別喺有蕃薯,芋頭同糉食
食完早餐仲有大把時間又去浸過溫泉,十二點Check Out之後就搭車去食午餐
不過呢餐味道就麻麻喇!食完之後就搭車返羅湖!有啲團友就喺皇崗落車再去揼骨.
留言列表
